Det formelle, kort fortalt.

Partar

Seljar er Steinholm Software, org.nr 935 251 419, som driv kauke.no.

• E-post: kontakt@kauke.no
• Adresse: Ole Vigs vei 4, 7043 Trondheim
• Telefon: +47 928 19 685

Kjøpar er gruppa som bestiller, ved den som har rett til å forplikte henne. Er kjøparen eit lag, eit korps, eit kor eller ein annan foreining, vert kjøpet rekna som eit næringskjøp. Er kjøparen ein privatperson, gjeld i tillegg reglane for forbrukarkjøp, og det står under der det gjev ein skilnad.

Betaler de med kort, går kjøpet gjennom Stripe, og då er Stripe formelt seljar. Stripe står for kvitteringa, meirverdiavgifta og tilbakebetalinga, medan kauke leverer tenesta, og desse vilkåra gjeld på same måte. Stripe sine eigne vilkår for kjøpet blir viste før de betaler.

Kva de kjøper

De kjøper den betalte planen for éi gruppe i tolv månader. Han gjev meir lagringsplass og lengre videoar enn gratisplanen. Kva som er med, står på prissida, og dei tala er dei same som tenesta faktisk handhevar.

Prisar

Prisen er 1500 kr per gruppe per år, inkludert mva. Prisen er den same uansett kor mange medlemmer gruppa har. Endrar vi prisen, gjeld den nye prisen frå neste fakturering, og vi seier frå i god tid før.

Betaler de med kort, er prisen 1500 kr, og meirverdiavgift i landet de høyrer heime kjem i tillegg, òg i Noreg. Beløpet blir trekt i norske kroner, og totalen blir vist før de betaler.

Invitasjon på SMS

Den som arrangerer eit frittståande arrangement kan kjøpe ei utsending av invitasjonen på SMS. Prisen er 3 kr per utsending pluss 1 kr per mottakar. Med Vipps er mva inkludert. Beløpet blir reservert før noko blir sendt, trekt når meldingane er sende, og frigjort igjen viss ingen av dei kom fram. Med kort kostar ei utsending minst 10 kr, og mva i landet ditt kjem i tillegg. Beløpet blir belasta med ein gong og refundert i sin heilskap viss ingen av meldingane kom fram. Kjøpet er fullført når meldingane er sende.

Betaling

De får faktura frå Steinholm Software med tolv dagars betalingsfrist, og betaler for eitt år om gongen. Ved forseinka betaling kjem det forseinkingsrente etter forseinkingsrentelova. Vi slettar aldri innhald fordi ein faktura er ubetalt. Vert han ståande ubetalt, går gruppa tilbake til gratisplanen.

Der kauke tilbyr kortbetaling, betaler de hos Stripe, og beløpet blir trekt med ein gong. De får kvittering frå Stripe og ingen faktura frå Steinholm Software. Vi lagrar ikkje kortet, og ingenting blir trekt seinare utan at de sjølve betaler på nytt.

Levering

Dette er ei digital teneste, og ho vert levert med éin gong betalinga er registrert: gruppa får den nye plassen med det same, og de treng ikkje gjere noko. Tek det meir enn ein verkedag, sei frå på kontakt@kauke.no.

Bindingstid og oppseiing

Det er inga bindingstid utover året de har betalt for, og ingenting vert fornya av seg sjølv. Vi sender ein ny faktura når året nærmar seg slutten, og vel de å la vere å betale han, er det oppseiinga. Gruppa går då tilbake til gratisplanen.

Har de betalt med kort, sender vi ingen faktura og trekkjer ingenting frå kortet når året er omme. Vil de ha eit år til, betaler de på nytt. Lèt de vere, går gruppa tilbake til gratisplanen.

Innhaldet vert liggjande. Har de lagra meir enn gratisplanen rommar, kan de ikkje laste opp nytt før de har sletta noko, men vi slettar ingenting for dykk, og alt som allereie ligg der er framleis synleg og mogleg å laste ned.

Angrerett

Er kjøparen ein forbrukar, gjeld angrerettlova, med fjorten dagars angrefrist frå den dagen avtalen vart inngått. Ved ei digital teneste som vert levert med éin gong, fell angreretten bort når leveringa er fullført og kjøparen har samtykt til det.

Er kjøparen eit lag eller ei foreining, gjeld angrerettlova ikkje. Vi gjev likevel den same fristen: sei frå innan fjorten dagar, så får de pengane tilbake, utan at de treng å grunngje det. Send ein e-post til kontakt@kauke.no. Vi betaler tilbake innan fjorten dagar frå vi høyrde frå dykk.

Bur de i eit anna land, gjeld angreretten der de bur, med minst fjorten dagar i EU og EØS. Ved kortbetaling går tilbakebetalinga gjennom Stripe, som er seljar. Skriv til oss uansett, så ordnar vi det.

Retur

Ei digital teneste kan ikkje returnerast slik ei vare kan. Vil de ut av avtalen, er det angreretten over eller oppseiinga som gjeld. Tilbakebetaling skjer til kontoen fakturaen vart betalt frå, eller til kortet som vart belasta.

Reklamasjonshandtering

Verkar ikkje tenesta som ho skal, sei frå til kontakt@kauke.no innan rimeleg tid etter at de oppdaga feilen. Skildre kva som er gale, så svarar vi så fort vi kan, og seinast innan ti verkedagar. Er det ein feil hos oss, rettar vi han. Får vi han ikkje retta, kan de krevje avslag i prisen eller heve kjøpet og få att den delen av året de ikkje fekk brukt. Reklamasjonsfristane følgjer kjøpslova, og forbrukarkjøpslova der ho gjeld. Bur de i eit anna land, held de på dei rettane som ikkje kan fråvikast der.

Konfliktløysing

Ta kontakt med oss først, for det meste løyser seg der. Kjem vi ikkje til semje, kan ein forbrukar klage til Forbrukarrådet, som meklar i saka. Bur de i eit anna EU/EØS-land, kan de òg klage til forbrukarstyresmaktene der de bur, og Forbrukar Europa hjelper med klager over landegrensa. Tvistar kan elles takast inn for dei ordinære domstolane, med norsk rett og verneting hos seljaren som utgangspunkt. For ein forbrukar gjeld likevel dei reglane i heimlandet som ikkje kan fråvikast.

Personvern

Kva vi lagrar om dykk, kor lenge, og kven vi deler det med, står i personvernerklæringa. Kjøpet endrar ingenting på kven som ser innhaldet i gruppa.